First published on 10 April 2022
2022年已經過了四分一。要總結這三個月的生活，我會用「一塌糊塗」。
年頭疫情較穩定時，我多了回辦公室工作，但身體還是不太適應。每天下班乘車時，頭極痛。加上我自幼都有點暈車浪，現在體力稍遜，暈車浪的情況便更差——每每下車時，總覺得腳步有點浮。慶幸現在我還未需要每天都回辦公室，第二天可以在家工作，回一回氣。
二月底，香港爆發第五波疫情；三月，我亦因為成了緊密接觸者而在家隔離了兩星期。
雖然「龍床不及狗竇」，在家隔離已經較待在隔離營好上百倍，但沒想到，隔離生活仍磨掉了我的精神意志。沒能外出，兩個星期困在同一個空間，對著一樣的四面牆，不想坐著玩電腦、電話，剩下的私人空間便只有自己的狗竇——香港，土地問題嘛。
生活也慢慢變得索然無味。
兩星期過後，我多了不少壞習慣︰早上瀨床、日間不時躺在床上玩電話和吃飽飯立刻瞓低。
同時，身體狀況明顯變差。隔離完再次外出時，散步氣喘，感覺甚是疲累。然後，我的胃開始痛。吃過胃藥，情況時好時壞。嚴重時晚上痛得不能入眠，早上清晨又會痛醒。
回頭一看，我才發覺自己的生活竟變得如此一塌糊塗。
踏入四月，反省過自己此前積下來的陋習後，我痛下決心，要找回生活的節奏。
第一是要作息定時，日間避免瞓低。吃飽飯即使頭痛，不夠兩小時，亦不可瞓低。電話只能坐著或站著玩。
第二便是寫文。小休了三個月，假如再不提筆寫作，我的筆應該快要生鏽。而且，寫文除了可以整理我的思緒外，還是推動我假日不要瀨床的力量，因為我一向習慣在假日寫作。
另外，當然少不了繼續鍛練體能。除了核心肌肉、平衡力、肌肉的力量和控制外，耐力也是我需多下點苦功的。這陣子我再次挑戰太空漫步機，最高紀錄是連續踩八分鐘。
這三個小目標不算很艱難，但需要恆心和非常自律；希望我會做到啦！
最後輕鬆啲，想講下我玩部太空漫步機時，發生嘅一段小插曲。
嗰日喺治療室（其實同健身室冇乜分別，都係有拉鐵、單車機、跑步機嗰啲），我上咗去開始踩部太空漫步機之後，旁邊鞭策我嘅姑娘就禁一禁部機個開關，諗住幫我計時，但係部機就禁極都唔識著，眨一下又熄返。
「佢係咪壞咗呢？」姑娘一臉疑惑，自言自語；再同我講︰「你落一落嚟先。」
我落返地下之後，姑娘就上咗部機踩兩嘢。
佢一踩，部機即、著。
跟住，佢一邊喺部機落返地下，一邊好正經咁同我講︰「部機冇壞，只係要踩快啲啫……」
我呢，就尷尬微笑，再上返去繼續好辛苦咁（慢）踩。
冇錯，部機個設計係靠動能嚟發電，亦即係靠踩嗰個——即係本人——去推動個摩打嚟發電、計時。
踩啊踩，我一直踩到最後（其實都只係八分鐘之後），氣來氣喘。冇講笑，踩到我兩個大脾都開始痠痛……
但部機都仲係一直冇著過……陰功…… ><
哈哈哈！我仍需努力呢！
王心其 