四月三十日，姜濤生日。雖然我唔係姜濤嘅 fans，但對佢都有好感；無他，姜濤眉清目秀，心地善良嘛。
尋日上晝同媽咪經過銅鑼灣，於是湊熱鬧搭姜濤 fans 贊助嘅免費電車。
據聞，今次係香港史上首次由民間團體自發舉辦嘅免費乘車日。電車嘅錢箱同八達通機都笠住咗個布袋，袋上印有姜濤個靚樣同今次活動名稱，提醒大家唔使俾錢。
媽咪好似比我更樂在其中，落咗車好興奮咁講︰「如果唔係頭先咁多人，冇得一齊坐，我仲諗住同你自拍，等人睇下我哋都有搭免費電車。」
我向佢淺淺一笑，心諗︰好彩。佢一開心就會捉我一齊自拍，然後要我揸機……
放眼銅鑼灣街頭，人流明顯比上一個星期六多幾倍——冇錯，係幾倍！
香港人周末行街，通常一點後先開始；但尋日十一點幾已經人頭湧湧，認真少見，原因當然係因為姜濤啦！姜濤號（電車）尋日十一點駛經銅鑼灣；而銅鑼灣同尖沙咀都分別有商場設有慈善 pop-up store，賣姜濤嘅紀念品。呢啲慶祝活動吸引晒港九新界嘅姜糖一齊出嚟銅鑼灣。
當中最有趣嘅街頭畫面，並唔係少女拎住姜濤應援、用手機自拍，而係讀幼稚園或小學嘅囝囝拖住媽媽，陪媽媽嚟同姜濤慶生——有啲囝囝會幫媽媽拎住個姜濤公仔，跟住媽媽行，有啲囝囝個背囊就放住長度突晒出嚟嘅應援橫幅。我見到呢啲場面，覺得好 sweet 呢；而家追星都已經變咗做親子活動喇！
講到尾，追星都係想氹自己同氹偶像開心；而難得嘅係姜濤呼籲姜糖，將應援費用攞嚟做善事，於是姜糖就響應——自發請市民搭電車，全城開心；搞慈善義賣，幫助其他人。
見到咁多姜糖約埋一齊開開心心打卡、自拍，銅鑼灣氣氛又咁熱鬧，我唔係姜糖，都覺得好開心，甚至開心過過年添！
你話呢，姜濤同姜糖係咪都好可愛呢？！
王心其 