最近放假，冇特別計劃，但有去行下街。本來我想買衫，可惜冇件啱心水。經過某連鎖店 O，於是入去行下。
我一向好鍾意行 O，因為佢賣嘅嘢乜都有啲，潮流電子玩意、文具精品、護理美容、衣物手袋……唔買齋睇下啲靚嘢都賞心悅目，或者見到啲設計好嘅嘢又可以開下眼界，而有時佢賣啲護膚產品又平過「花花」，都幾盞鬼。
我喺 O 買得最多嘅，係瞓覺用嘅耳塞，貪佢多款揀；而佢呢五、六年賣過嘅款式，我差唔多全部都買過、用過。
今次去行 O，都冇諗住買嘢；但點知行行下，我見到一個好鍾意嘅袋（shoulder bag）。
離遠見到，首先引我注目嘅係個袋好特別嘅藍綠色。其次就係佢低調得嚟、好有美感——設計簡單，單色冇圖案，但有條紐結織成嘅孭帶做點綴。
行埋拎個袋上手，就更加鍾意。佢軟身得嚟好輕，又實用，大細夠我放簡單落街要用嘅嘢——銀包、電話、鎖匙、紙巾、搓手液同口罩，甚至放埋個細嘅水樽都得。更實用嘅係佢送多條長啲嘅孭帶，雖然設計比較普通，冇紐結，但換咗佢可以轉斜孭，啱晒我。
望埋價錢，非常合理，於是拍板去俾錢。
俾錢前循例問下店員有冇新，佢話個陳列品已經係最後一個；睇嚟呢個袋真係好受歡迎。
袋嘅嘢，我一向覺得買到個合眼緣又實用嘅真係好難。靚嘅袋的確有好多，但拎上手好多唔係太重（特別係真皮袋，分分鐘有我枝水咁重），就係打開睇過後，發覺唔實用（放咗銀包電話就已滿）；甚至乎係既重又唔實用。
難得今次買到心頭好，真係可遇不可求，很是開心呢！
最後，當然要借呢個機會做下樹打手，放首 Serrini 最近嘅歌︰《樹木真美》。無論係曲、詞、編曲，定 MV，我都好鍾意呢首歌。MV 有好多亮點，除咗例牌嘅靚人、靚衫、得意嘅道具，仲有就係最尾 Serrini 搵個哥哥仔夾咗佢架毛毛車車！！！有興趣自己睇下︰
MV 仲有 Behind the Scenes 睇︰
王心其 